Nemendastýrð foreldraviðtöl

Síðastliðinn þriðjudag var foreldradagur í skólanum hjá okkur. Dagurinn var þó ekki með hefðbundnu sniði, þar sem umsjónarkennari ræðir við nemenda og foreldra, heldur voru viðtölin nemendastýrð. Nemendastýrð foreldraviðtöl fela í sér að  nemandinn sjálfur undirbýr viðtalið í samvinnu við umsjónarkennarann sinn, æfir sig og stjórnar viðtalinu eftir fyrirfram ákveðinni dagskrá. Hlutverk kennarans er að grípa aðeins inn í ef nauðsyn krefur og svara spurningum ef þær vakna hjá nemenda og foreldri. Nemendastýrð viðtöl geta verið afar valdeflandi og undirstrikað ábyrgð og áhrif nemenda á eigin námi. Útfærslur viðtalanna eru mismunandi og fara eftir aldri og þroska nemenda. 

Um frumraun er að ræða í skólanum okkar. Í febrúar fóru til að mynda allir umsjónarkennarar skólans í heimsókn í Grunnskóla Reyðarfjarðar til að læra af reynslu þeirra. Hugmyndin er að framvegis verði nemendastýrð viðtöl hluti af skólastarfinu á vorönn. Kennarar eru almennt sammála um að vel hafi tekist til í fyrsta kasti en slípa þurfi til einstök atriði.